Денес, 8-ми мај 2021, со почеток од 20:00 часот се одржа вебинар на кој беше отворена Платформата за психолошка поддршка на МСУ. Со оглед на стресната ситуација предизвикана од КОВИД-19 во која веќе подолго време се наоѓаме МСУ одлучи овој период да биде со вас и да ви подаде рака. Платформата се состои од серија бесплатни едукативни вебинари на стручни теми од психологијата, забавни настани и индивидуална поддршка од лиценцирани психолози.
Платформата ја отвори доц. д-р Ана Чучкова од Факултетот за психологија при Меѓународен Славјански Универзитет „Г. Р. Державин“.
Што нуди платформата?
Едукативни вебинари. Програмата ќе понуди серија бесплатни едукативни вебинари кои се со стручни теми од психологијата и преку кои секој од вас ќе може да научи нешто за себе и начинот како да се справува во одредени ситуација.
Забавен дел. Покрај стручните вебинари платформата ќе понуди и забавен дел во кој ќе можете да учествувате преку Zoom. Во забавниот дел нудиме неколку настани во кои ќе можеме да се дружиме, да разговараме, да патуваме виртуелно, да погледнеме и дискутираме некој филм, да се смееме и да споделуваме позитивна енергија. Овој дел нуди атмосфера која има за цел да не ослободи од секојдневните грижи и загрижувачки мисли.
Консултации со психолози. Платформата ќе понуди и бесплатни консултации со лиценцирани психолози и професори со кои ќе можете лично да исконтактирате и да добиете соодветна поткрепа и насоки за ваш личен проблем. Се разбира, ние ви нудиме 100% дискретност.
По повод лансирањето на платформата во рамки на истиот настан се одржа и вебинар на тема „Слободната игра како еден од најважните фактори за здрав детски развој“ – доц. д-р Ана Чучкова.
Разговаравме за:
- Што значи слободна игра?
- Кои се придобивките за детето со слободната игра?
- Симболите во детската слободна игра
Наредните настани кои ќе се одржуваат можете да ги следите овде.
